عيسی ﵇ يو معيوب کس ته شفا ورکوي

له دې وروسته عيسی ﵇ يروشلم ته تشريف يووړ، تر څو هلته د بني اسراييلو يو اختر تېر کړي. په يروشلم کې د پسونو له دروازې سره يو حوض و، چې د بيت زاتا حوض نومېد. د دغه حوض په شاوخوا کې پنځه سوپې وې. ډېر ناروغان لکه ړانده، شلان او فلج شوي کسان به د اوبو خوځښت ته په تمه پراته وو. (د خلکو عقيده دا وه چې کله نا کله به دې حوض ته يوه ملايکه راتله. د حوض اوبه به يې وخوځولې. بيا چې به هر څوک لومړی اوبو ته ورښکته شو، نو له خپلې ناروغۍ څخه به يې شفا پيدا کړه.) په دغو ناروغانو کې يو سړی و، چې له اته دېرشو کلونو راهيسې معيوب و. کله چې عيسی ﵇ دغه ځای ته تشريف راووړ او معيوب سړی يې وليد، ورته معلومه شوه چې دی له ډېره وخته دلته پروت دی، نو يې پوښتنه ځينې وکړه: آيا ته غواړې شفا پيدا کړې؟

ناروغ وويل: صاحبه، کله چې دغه اوبه په خوځښت راشي، زه داسې څوک نه لرم چې اوبو ته مې ورورسوي. زه چې تر څو ځان وررسوم، بل څوک راڅخه مخکې شي.

عيسی ﵇ ورته وفرمايل: راپاڅه. خپله بستره دې ټوله کړه او پر پښو روان شه!

سړی سمدستي روغ او جوړ شو. خپله بستره يې ټوله کړه او په پښو يې تګ پيل کړ.

دغه پېښه د عبادت په ورځ تر سره شوې وه. نو د بني اسراييلو مشرانو هغه سړی تر نيوکې لاندې راوست او ويې ويل: د شريعت له مخې ته اجازه نه لرې، چې د عبادت په ورځ خپله بستره يوسې، ځکه په دغه ورځ هر ډول دنيوي کار منع دی.

سړي ورته وويل: کوم چا چې زه روغ کړم، راته ويې ويل چې خپله بستره دې ټوله کړه او پر پښو روان شه.

مشرانو پوښتنه ځينې وکړه: دا څوک و، چې داسې غير شرعي خبره يې درته کړې ده؟

خو روغ شوی سړی نه پوهېد، چې نوم يې څه و، ځکه عيسی ﵇ د خلکو په ګڼه ګوڼه کې له هغه ځايه تللی و.

يو څه وخت وروسته عيسی ﵇ له دغه سړي سره د بيت المقدس په حرم شريف کې مخامخ شو او ورته ويې فرمايل: ګوره! اوس روغ شوی يې. نو له ګناهونو څخه لاس واخله! که نه، ستا حال به تر مخکې لا بدتر شي.