له عيسی ﵇ سره خپل کليوال ناوړه غبرګون ښکاره کوي
عيسی ﵇ ناصرت ته تشريف راووړ، چېرې چې يې د کوچنيوالي ورځې تېرې کړې وې. د تل په څېر د عبادت په ورځ محلي عبادتخانې ته داخل شو. د خلکو په مخ کې ودرېد، تر څو له کلام ﷲ څخه يوه برخه ولولي. ده ﵇ ته د اشعيا نبي ليکنه ورکړل شوه. خلاصه يې کړه او خلکو ته يې هغه برخه ولوستله، چې فرمايي: « د ﷲ ﷻ سپېڅلی روح پر ما نازل شوی دی. په دې خاطر زه مقرر او انتخاب شوی يم، تر څو مسکينانو او غريبانو ته د خوشحالۍ زېری ورکړم او له دې پيغام سره رالېږل شوی يم، چې اوس د ﷲ ﷻ د فضل او پېرزوينې خاص وخت رارسېدلی دی، چې بنديان به خوشې شي، ړانده به بينا شي او مظلومان به له ظلم څخه خلاصون پيدا کړي.»
له لوستلو وروسته يې ليکنه ټوله کړه، د عبادتخانې خدمتګار ته يې ورتسليم کړه او کېناست. د ټولو خلکو سترګې عيسی ﵇ ته پاتې وې. ده ﵇ وفرمايل: د کلام ﷲ دغه خبرې، چې تاسې اوس واورېدلې، نن ستاسې د سترګو په وړاندې پوره او رښتيا شوې!
حاضرو خلکو د عيسی ﵇ صفتونه کول او ښو ښو خبرو ته يې حيران ولاړل. يو بل ته يې سره ويل: آيا دا د يوسف نجار زوی نه دی؟
عيسی ﵇ وفرمايل: تاسې به حتمي هغه متل راته تېروئ، چې وايي: «ای طبيبه! ته اول د ځان علاج وکړه.» موږ خبر شوي يو، چې تا په کَفرناحوم کې ډېرې معجزې وښودې. نو دلته په خپل پلرني ښار کې يې هم ښکاره کړه! زه حقيقت درته وايم، چې هېڅ نبي په خپل وطن کې نه منل کېږي. د دې خبرې يو ښه مثال د الياس نبي کيسه ده. د هغه ﵇ په زمانه کې تر درې نيمو کلونو پورې يو څاڅکی باران نه و شوی او د بني اسراييلو په ټوله ځمکه کې سخته کاختي راغلې وه، مګر ﷲ ﷻ الياس ﵇ د هغوی له جملې څخه د هېچا مرستې ته هم ورونه لېږه، بلکې د يوې غير بني اسراييلۍ کونډې مرستې ته يې ورولېږه، چې د صيدون د سيمې په صرفند ښار کې اوسېده. همدارنګه يو بل مثال د اليسع نبي کيسه ده. د هغه ﵇ په زمانه کې په بني اسراييلو کې ډېر کسان وو، چې د پوستکي په ناپاکوونکي مرض اخته وو، مګر له هغوی څخه يوه هم شفا پيدا نه کړه. يوازېنی کس چې شفا يې پيدا کړه، د شام يو غير بني اسراييلی، نعمان نومې سړی و.
حاضرو خلکو چې دا خبرې واورېدې، نو ډېر په غصه شول. دا ښار پر يوې غونډۍ آباد و، نو خلک له ځايه راپورته شول او په زور يې عيسی ﵇ د ښار دباندې د غونډۍ څنډې ته بوت، تر څو لاندې يې وغورځوي، مګر دی ﵇ د دوی له منځه ووت او په خپله لار روان شو.