عيسی ﵇ د قانا په ښار کې د شاهي دربار د یوه غړي زوی ته شفا ورکوي
له دغو دوو ورځو وروسته عيسی ﵇ بېرته ګليل ته ولاړ. د ده ﵇ په اړه په ټوله سيمه کې معلومات خپاره شول. خلکو د ده ﵇ ښه هرکلی وکړ، ځکه چې دوی د هغو لويو لويو کارونو عيني شاهدان وو، چې عيسی ﵇ په يروشلم کې د پنا اختر په وخت کې تر سره کړي وو. عيسی ﵇ په محلي عبادتخانو کې خلکو ته الهي درسونه ورکول او ټولو خلکو يې ډېر صفت کاوه.
يوه ورځ يې قانا ښار ته تشريف يووړ، چېرې چې پخوا يې عادي اوبه د انګورو په اوبو بدلې کړې وې. په نږدې ښار کَفرناحوم کې د شاهي دربار یو غړی و، چې زوی يې ډېر مريض شوی و. کله چې دغه کس خبر شو، چې عيسی ﵇ له يهوديې څخه ګليل سيمې ته تشريف راوړی دی، نو راغی او زارۍ يې ورته وکړې، چې زما زوی مريضۍ د مرګ تر خولې رسولی دی. هيله کوم، کَفرناحوم ته راشه او زما زوی ته شفا ورکړه!
عيسی ﵇ ورته وفرمايل: تاسې د ګليل خلک پر ما يقين نه کوئ، تر څو معجزې او نښې درته ښکاره نه کړم.
هغه وويل: صاحبه، هيله کوم، ژر راشه. که نه، زما زوی به مړ شي.
عيسی ﵇ ورته وفرمايل: ته بېرته کور ته ولاړ شه. ستا زوی به ژوندی پاتې شي.
هغه د عيسی ﵇ په خبره يقين وکړ او خپل کور ته روان شو. کور ته چې لا نه و رسېدلی، نوکران ورته راغلل او ويې ويل: ستا زوی د مرګ له خطره وتلی او ژوندی دی!
هغه پوښتنه ځينې وکړه چې په څو بجو یې شفا پيدا کړه؟
دوی ورته وويل: پرون يوه بجه يې تبه وشکېده.
له دې سره سړی پوه شو، چې دا هماغه وخت و، چې عيسی ﵇ راته ويلي وو: «ستا زوی به ژوندی پاتې شي.» نو سړي او ټولې کورنۍ يې پر عيسی ﵇ باندې ايمان راووړ. دا دويمه معجزه وه، چې عيسی ﵇ له يهوديې څخه ګليل ته، تر راتلو وروسته تر سره کړې وه.