د ريښتيني عبادت په اړه د عيسی ﵇ خبرې

افريسيانو اورېدلي وو، چې عيسی ﵇ تر يحيی زيات پيروان پيدا کوي او پر زياتو کسانو سپېڅلې غوټه تر سره کوي. (خو حقيقت دا و چې عيسی ﵇ پخپله نه، بلکې نږدې اصحابو يې خلکو ته سپېڅلې غوټه ورکوله.) کله چې عيسی ﵇ د افرسيانو له بد نيت او د يحيی ﵇ له بندي کېدو څخه خبر شو، نو په دې خاطر يو ځل بيا له يهوديې څخه ګليل سيمې ته روان شو.

په لاره کې ورته لازمه وه، چې د سامريې تر سيمې تېر شي. داسې وشول چې هلته د سامريانو يوه کلي ته ورسېد، چې سوخار نومېد. دغه کلی هغې ځمکې ته نږدې و، چې ډېر پخوا يعقوب ﵇ خپل زوی يوسف ﵇ ته په ميراث کې ورکړې وه. د کلي دباندې يوه څاه وه، چې د يعقوب څاه نومېده. غرمه وه چې عيسی ﵇ دغې څاه ته ورسېد. له خپل سفر څخه ستړی شوی و، نو له څاه سره کېناست. نږدې اصحاب يې کلي ته داخل شول، چې خوراکي توکي واخلي.

په دې وخت کې يوه سامرۍ ښځه په اوبو پسې څاه ته راغله. عيسی ﵇ ورته وفرمايل: ما ته لږې اوبه راکړه.

ښځې وويل: عجيبه ده! ته يهودی يې او زه سامرۍ يم. يهوديان له سامريانو سره هېڅ راکړه ورکړه نه لري. نو د خپل دود پر خلاف دې ولې له يوې سامرۍ ښځې څخه اوبه وغوښتلې؟

عيسی ﵇ ورته وفرمايل: که ته د ﷲ ﷻ په ورکړه خبره وای او که پوهېدلای چې اوبه غوښتونکی په اصل کې څوک دی، نو له هغه څخه به دې غوښتنه کړې وای او ژوند بخښونکې اوبه به یې درکړې وای.

ښځې وويل: ښاغليه، ته سطل هم نه لرې او دا څاه ډېره ژوره ده. نو ژوند بخښونکې اوبه به له کومه راوړې؟ آيا ته خپل ځان زموږ تر ستر بابا يعقوب ﵇ لوړ ګڼې، چا چې دغه څاه موږ ته را پرې ايښې ده؟ د دغې څاه اوبه به هغه ﵇، د هغه زامنو او څارويو څښلې او ته وايې، چې تر دې به ښې اوبه راکړې؟

عيسی ﵇ وفرمايل: که څوک له دې څاه څخه اوبه وڅښي، بيا به تږی شي. خو کومې اوبه چې زه چا ته ورکوم، تر څښلو ورسته به بيا هېڅلکه تږی نه شي. دغه اوبه به په هغه شخص کې داسې يوه چينه جوړه کړي، چې ډکه به بهېږي او د نېکمرغۍ ابدي ژوند به ورپه برخه کوي.

ښځې وويل: ښاغليه، له دې اوبو څخه لږ ما ته راکړه. بيا به هېڅکله تږې نه شم او له دې تکليف څخه به هم خلاصه شم، چې دلته په اوبو پسې راشم.

عيسی ﵇ ورته وفرمايل: ته ولاړه شه! خپل مېړه دې راوله!

ښځې وويل: زه مېړه نه لرم.

عيسی ﵇ وفرمايل: رښتيا وايې چې مېړه نه لرې، ځکه چې پنځه واره دې مېړه کړی دی او له چا سره چې اوس اوسېږې، هغه دې مېړه نه دی. نو ستا خبره رښتيا ده چې مېړه نه لرې.

ښځې وويل: ښاغليه، ستا له دې خبرو څخه معلومېږي چې ته يو پيغمبر يې. نو راته ووايه چې تاسې يهوديان ولې ټينګار کوئ، چې د ﷲ ﷻ د عبادت اصلي ځای يروشلم دی؟ خو زموږ د سامريانو پلرونو او نيکونو دلته د جرزيم په غره کې عبادت ادا کړی دی.

عيسی ﵇ په ځواب کې وفرمايل: آغلې، زما پر دې خبره يقين وکړه، چې داسې وخت راتلونکی دی چې د پروردګار عبادت ادا کول به په کوم خاص ځای پورې محدود نه وي، نه په دغه غره پورې او نه په يروشلم پورې. تاسې سامريان چې د کوم ذات عبادت کوئ، هغه سم نه پېژنئ، خو موږ يهودان يې ښه پېژنو، ځکه چې نجات ورکوونکی له بني اسراييلو څخه دی. د دې وخت ډېر نږدې دی، بلکې شروع شوی دی، چې رښتيني عبادت کوونکي به د پروردګار عبادت په کوم خاص ځای کې نه، بلکې د زړه له اخلاصه په روحاني او حقيقي ډول تر سره کوي. زما پروردګار د دغسې عبادت کوونکو په تلاش کې دی. د ﷲ ﷻ ذات په يوه جسماني کالبوت کې نه قيدېږي. نو که څوک غواړي د ﷲ ﷻ عبادت وکړي، بايد د زړه له اخلاصه يې په روحاني او حقيقي ډول ادا کړي.

ښځې وويل: زه پوهېږم چې المسيح راتلونکی دی، څوک چې ﷲ ﷻ خپل خاص استازی ټاکلی دی. کله چې راشي، موږ ته به د هر څه په باره کې معلومات راکړي.
عيسی ﵇ ورته وفرمايل: المسيح زه يم!

په دغه وخت کې د عيسی ﵇ پيروان راښکاره شول. دی ﵇ چې يې وليد، ډېر په تعجب کې شول، چې ولې له يوې ښځې سره خبرې اترې کوي؟ خو يوه يې هم جرات ونه کړ، چې پوښتنه ځينې وکړي، «له دې ښځې سره څه کار لرې؟» يا «ولې ورسره خبرې کوې؟»

ښځې خپل منګی پر ځمکه پرېښود او په منډه يې ځان کلي ته ورساوه. خلکو ته يې وويل: راځئ داسې سړی وګورئ، چې زما ټول کړي کارونه يې ټکي په ټکي راته بيان کړل! آيا کېدای شي چې هغه وعده کړل شوی استازی المسيح وي؟

خلک هم له کلي څخه راروان شول چې عيسی ﵇ وويني.

هغوی چې لا نه وو رارسېدلي، نږدې اصحابو عيسی ﵇ ته وويل: استاده، يو څه ډوډۍ وخوره.

ده ﵇ ورته وفرمايل: زه داسې خوراک لرم چې تاسې پرې خبر نه ياست.

اصحابو يو بل ته وويل: آيا ده ﵇ ته کوم چا خواړه راوړي دي؟

عيسی ﵇ ورته وفرمايل: زما د روح غذا دا ده، چې زه د خپل رالېږونکي له ارادې او رضا سره سم عمل وکړم او هغه کارونه سر ته ورسوم، چې ما ته يې راسپارلي دي. تاسې دغه متل واياست چې «د رېبلو تر موسمه پورې څلور مياشتې لا پاتې دي.» خو زه وايم چې تاسې نظر واچوئ او کښتونو ته وګورئ! وږي پاخه شوي دي او همدا اوس د رېبلو لپاره تيار دي. څوک چې فصل رېبي، مزدوري اخلي. ثمر او حاصل يې هغه خلک دي، چې د نېکمرغۍ ابدي ژوند ورپه برخه کېږي، چې په نتيجه کې به يې هم تخم کرونکی او هم رېبونکی په ګډه سره خوشحالي وکړي. دا متل هم رښتيا دی چې وايي: «يو يې کري او بل يې رېبي.» زه تاسې د هغه فصل رېبلو لپاره لېږم، چې تاسې يې په روزلو کې زحمت نه دی ايستلی. نورو خلکو دغه زحمت ايستلی دی، خو د ثمر او حاصل راټولول يې ستاسې په برخه شوي دي.

په دې کلي کې ډېرو سامريانو پر عيسی ﵇ باندې ايمان راووړ او سبب يې د هغې ښځې شاهدي وه، چې ويلي يې وو: «زما ټول کړي کارونه يې ټکي په ټکي راته بيان کړل!» کله چې دغه خلک عيسی ﵇ ته راغلل، زارۍ يې ورته وکړې، چې له دوی سره نور هم پاتې شي. عيسی ﵇ هم دوې ورځې ورسره تېرې کړې. په دغو دوو ورځو کې ډېرو نورو سامريانو هم د ده ﵇ خبرې واورېدې او ايمان يې پرې راووړ. هغې ښځې ته يې وويل: اوس پر دغه سړي زموږ ايمان يوازې ستا د خبرو پر اساس نه دی، بلکې موږ په خپلو غوږونو د ده ﵇ خبرې اورېدلي دي او پوهېدلي يو، چې دی په رښتيا د نړۍ د ټولو وګړو لپاره نجات ورکوونکی دی.