د حق ويلو په سبب د يحيی ﵇ بندي کېدل
يحيی ﵇ په همدې ډول خلکو ته ډېر نصيحتونه کول او د المسيح د راتګ زېری يې ورکاوه. خلکو وويل: موږ څه وکړو؟
يحيی ﵇ وفرمايل: که څوک دوه کميسه لري، يو دې يې هغه چا ته ورکړي چې هېڅ کميس نه لري. همدارنګه که څوک ډوډۍ لري، له مسکينانو سره دې يې ووېشي.
په دغه وخت کې محصول اخيستونکي هم د سپېڅلې غوټې په خاطر يحيی ﵇ ته راورسېدل او ويې ويل: استاده! موږ ته څه کول په کار دي؟
يحيی ﵇ وفرمايل: هغه مقدار ماليه چې تاسې ته په قانون کې ټاکل شوې ده، له هغه څخه زياته مه اخلئ!
بيا ځينو عسکرو پوښتنه وکړه: موږ څه وکړو؟
هغه ﵇ وفرمايل: له چا څخه په زور پيسې مه اخلئ! پر خلکو د درواغو تهمت مه لګوئ او پر خپل معاش قناعت وکړئ!
يوه ورځ يحيی ﵇ د ګليل ولايت حاکم هيرود انتيپاس وغنده، ځکه چې حاکم خپله ورينداره هيروديه ځان ته واده کړې وه، حال دا چې ورور يې ژوندی و. له دې پرته هيرود انتيپاس نور بد عملونه هم لرل، چې يحيی ﵇ به غندل. د هيرود انتيپاس پر دې ناوړو اعمالو يو بل هم وراضافه شو، هغه دا چې يحيی ﵇ يې زندان ته واچاوه.