د نوي ژوند په اړه د عيسی ﵇ بحث
له افريسي فرقې څخه د بني اسراييلو يو مذهبي مشر و چې نيکوديماس نومېد. هغه يوه شپه عيسی ﵇ ته راغی او ورته ويې ويل: استاد صاحب! موږ ټول په دې خبر يو، چې تاسې د ﷲ ﷻ لخوا د يوه لارښود په حيث راغلي ياست، ځکه کومې نښې او معجزې چې تاسې يې ښکاره کوئ، هېڅوک يې نه شي ښکاره کولای، بې له دې چې ﷲ ﷻ ورسره مل او ملګری وي.
عيسی ﵇ ورته وفرمايل: زه تاسې ته حقيقت وايم، چې هېڅوک د ﷲ ﷻ په سلطنت کې نه شي داخلېدلای، تر څو چې له سره بيا پيدا نه شي.
نيکوديماس وويل: استاده! له دې څخه مو مقصد څه دی؟ دا څنګه کېدای شي، چې يو غټ انسان دې دويم ځل پيدا شي؟ د خپلې مور نس ته خو نه شي داخلېدای چې بيا يې وزېږوي.
عيسی ﵇ ورته وفرمايل: زه تاسې ته حقيقت وايم، چې هېڅوک د ﷲ ﷻ په سلطنت کې نه شي داخلېدلای، تر څو چې د خدای ﷻ سپېڅلی روح يې باطن د رڼو اوبو په شان پاک نه کړي او بيا پکې نوی روح ورپو نه کړي. انسان په جسماني ډول د جسماني اړيکو په واسطه پيدا کېږي، خو په روحاني ډول د ﷲ ﷻ د سپېڅلي روح په واسطه پيدا کېږي. نو دا چې مې درته وويل، ته بايد بيا له سره پيدا شې، دا د حيرانتيا خبره نه ده. کله چې باد چلېږي، په خپله خوښه خپل مسير ټاکي. لکه څرنګه چې د باد غږ تاسې اورېدلای شئ، خو ستاسې فکر پرې نه رسېږي، چې باد له کومې خوا راځي او پر کومه خوا ځي، نو همدارنګه ستاسې فکر دې ته هم نه رسېږي، چې خلک څنګه د ﷲ ﷻ د سپېڅلي روح په واسطه پيدا کېږي.
نيکوديماس پوښتنه وکړه: استاده! څنګه امکان لري، چې ستاسې خبرې دې واقعيت وي؟
عيسی ﵇ په ځواب کې وفرمايل: ته خو د بني اسراييلو استاد يې، خو آيا بيا هم په دغو شيانو نه پوهېږې؟ زه تاسې ته حقيقت وايم، چې موږ يوازې هغه څه ويلي دي چې ښه راته معلوم دي او پر هغه څه مو شاهدي ادا کړې ده، چې په خپلو سترګو مو ليدلي دي، خو تاسې يو هم زموږ شاهدي نه منئ. ما تاسې ته د دې دنيا په باره کې خبرې کړې دي، خو تاسې پرې باور ونه کړ. نو که آسماني خبرې درته وکړم، په هغو به څنګه باور وکړئ؟ هېڅوک د ﷲ ﷻ دربار ته نه دی پورته شوی، پرته د بني آدمو له سردار څخه، چې اوس ځمکې ته ځينې راښکته شوی دی. لکه څرنګه چې موسی ﵇ په بيابان کې مسي مار د شفا د نښې په توګه پر لرګي پورته کړ، * همدارنګه ضروري ده چې د بني آدمو سردار هم هماغسې پورته کړل شي، تر څو پر هغه باندې هر ايمان راوړونکی د نېکمرغۍ ابدي ژوند تر لاسه کړي. ﷲ ﷻ د نړۍ له خلکو سره خپله مينه او محبت په دې ډول ښکاره کړ، چې خپل بې مثاله نازولی يې ورته راواستاوه، تر څو پر هغه باندې هر ايمان راوړونکی له ابدي هلاکت سره مخامخ نه شي، بلکې د نېکمرغۍ ابدي ژوند تر لاسه کړي. ﷲ ﷻ خپل خاص نازولی دې نړۍ ته نه دی رالېږلی، تر څو پر خلکو د سزا حکم صادر کړي، بلکې د دې لپاره يې رالېږلی چې د نړۍ خلک نجات پيدا کړي. هر څوک چې پر ما ايمان راوړي، هغه ته سزا نه ليکل کېږي، خو هر څوک چې پر ما ايمان رانه وړي، ګواکې له مخکې لا سزا ورته ليکل شوې ده، ځکه د ﷲ ﷻ پر بې مثاله نازولي يې ايمان نه دی راوړی. دغه فيصله پر دې اساس ده، چې د ﷲ ﷻ نور دنيا ته راغلی دی، خو تر دې رڼا خلکو تياره خوښه کړه، ځکه چې د دوی اعمال خراب او شرير وو. څوک چې خراب او شرير عملونه کوي، له نور او رڼا څخه کرکه کوي او په هېڅ قيمت الهي رڼا ته نه نږدې کېږي. وايي: داسې نه شي، چې زما خراب کارونه افشا شي. خو څوک چې د حق کارونه کوي، رڼا ته نږدې کېږي، تر څو ښکاره شي چې خپل نېک عملونه يې د ﷲ ﷻ په وسيله تر سره کېږي.
*دغه مسي مار هغه پېښې ته اشاره کوي، چې کله بني اسراييل په دښته کې وو او د خدای ﷻ له فرمان څخه یې سرغړونه وکړه، نو خدای ﷻ پرې زهري ماران مقرر کړل، چې ويې چيچي. بيا موسی ﵇ د خدای ﷻ په امر يو مسي مار جوړ کړ او په يوه لوړ لرګي يې نصب کړ. کله چې به مار چيچلي کس دغه مسي مار ته وکتل، نو له مرګه به يې نجات پيدا کړ.