عيسی ﵇ د بيت المقدس حُرمت پر ځای کوي
تر دې وروسته، عيسی ﵇ له خپلې مور، وروڼو او نږدې اصحابو سره کَفرناحوم ښار ته تشريف يووړ او هلته يې يو څو ورځې تېرې کړې.
هغه وخت نږدې و، چې د بني اسراييلو د پنا اختر ولمانځل شي، نو عيسی ﵇ يروشلم ته تشريف يووړ. کله چې بيت المقدس ته ورسېد، ګوري چې خلک په حرم شريف کې غوايان، پسونه او کوترې د قربانۍ لپاره خرڅوي او صرافان هم ناست دي. د دې په ليدو سره عيسی ﵇ له يو څو رسيو څخه يوه قمچينه جوړه کړه او ټول سوداګر يې يو ځای له غوايانو او پسونو سره له حرم شريف څخه وشړل. بيا يې د صرافانو مېزونه چپه کړل او د دوی سکې يې پر ځمکه خورې ورې کړې. په پای کې يې هغو خلکو ته چې کوترې يې خرڅولې، وفرمايل: خپل مالونه له دې ځای څخه يوسئ! زما د پروردګار له کوره يو عام بازار مه جوړوئ!
له دې سره نږدې اصحابو ته د زبور شريف هغه برخه ورپه ياد شوه چې وايي: «ستا د کور د عظمت او حرمت جذبه به ما واخلي.»
خو د بني اسراييلو مشرانو چې دا پېښه وليدله، عيسی ﵇ ته يې د اعتراض په ډول وويل: که خدای ﷻ تا ته د دې کارونو اختيار درکړی وي، نو موږ ته يوه الهي نښه راښکاره کړه.
عيسی ﵇ په ځواب کې وفرمايل: تاسې د ﷲ ﷻ دغه کور ړنګ کړئ. زه به يې بېرته په درېيو ورځو کې راپورته کړم.
د بني اسراييلو مشرانو وويل: دا ته څه وايې؟ د دغه الهي کور جوړولو شپږ څلوېښت کاله ونيول او ته يې په درېيو ورځو کې بېرته راپورته کوې؟
خو د ﷲ ﷻ له کور څخه د عيسی ﵇ مقصد د ده خپل ځان و.