د عيسی ﵇ لومړنۍ معجزه
دوې ورځې وروسته د ګليل سيمې په قانا ښار کې يو واده و، چې د عيسی ﵇ محترمې مور هلته تشريف درلود. عيسی ﵇ او د هغه نږدې اصحاب هم د مېلمنو په ډله کې وو. داسې وشول چې د انګورو اوبه پر خلاصېدو شوې. د عيسی ﵇ مور راغله او هغه ﵇ ته يې وويل: زويه، له دوی سره نورې د انګورو اوبه نشته.
عيسی ﵇ ورته وفرمايل: ای بي بي! دغه خبره په ما پورې څه اړه لري؟ زما مقرر شوی وخت لا نه دی رارسېدلی.
مور يې نوکرانو ته وويل: زما زوی چې هر څه درته ووايي، هغه تر سره کړئ!
په دغه شاوخوا کې شپږ غټ منګي ايښودل شوي وو، چې بني اسراييلو به د پاکوالي د مراسمو لپاره استعمالول. هر منګي له شلو تر دېرشو ګېلنو پورې ظرفيت درلود. عيسی ﵇ نوکرانو ته وفرمايل: دغه منګي له اوبو څخه ډک کړئ.
نوکرانو هم منګي تر خولې له اوبو څخه ډک کړل. بيا عيسی ﵇ ورته وفرمايل: اوس يو لوښی له دغو اوبو څخه ډک کړئ او د نوکرانو مشر ته يې وروړئ، چې ويې څکي.
دوی همداسې وکړل. کله چې يې مشر دغه اوبه، چې عيسی ﵇ د انګورو په اوبو بدلې کړې وې، امتحان کړې، ډېر حيران شو، چې دا د انګورو خوندورې اوبه له کومه شوې؟ خو نوکران پوهېدل چې له کومه شوي دي. د نوکرانو مشر زوم ته ورغږ کړ او ويې ويل: په مېلمستيا کې کوربه د انګورو با ارزښته اوبه په پيل کې راوړي. کله چې مېلمانه ډېرې وڅښي، بيا د انګورو کم ارزښته اوبه ورته راباسي. خو تا با ارزښته اوبه تر اوسه پورې ساتلې وې!
دا د عيسی ﵇ لومړۍ معجزه وه، چې د ګليل سيمې په قانا ښار کې يې تر سره کړه. له دې سره يې خلکو ته خپل شان او قدرت ښکاره کړ او د نږدې اصحابو ايمان نور هم ورباندې ټينګ شو.