د يحيی ﵇ لخوا د عيسی ﵇ تصديق
يحيی ﵇ په بيت عنيا ښار کې، چې د اُردن سيند په شرقي څنډه کې پروت و، خلکو ته سپېڅلې غوټه ورکوله. يوه ورځ له يروشلم څخه بني اسراييلي مشرانو يو څو امامان او د امامانو خدمتګاران ورولېږل، چې پوښتنه ترې وکړي، ته څوک يې؟ آيا ته وعده کړل شوی المسيح يې؟
يحيی ﵇ له رښتيا ويلو څخه انکار ونه کړ، بلکې په ښکاره يې وفرمايل، چې زه المسيح نه يم.
دوی پوښتنه وکړه: نو څوک يې؟ آيا ته الياس نبي يې؟
هغه ﵇ وفرمايل: نه! زه هغه هم نه يم.
دوی وويل: نو آيا هغه بل نبي يې، چې موسی ﵇ يې وړاندوينه کړې وه؟ *
يحيی ﵇ وفرمايل: نه!
دوی وويل: نو څوک يې؟ په ښکاره يې راته ووايه. هغه خلک چې موږ يې درته رالېږلي يو، له موږ څخه معلومات غواړي. ته د ځان په باره کې څه وايې؟
يحيی ﵇ وفرمايل: زه د اشعيا نبي له وړاندوينې سره سم په بيابان کې هغه نارې کوونکی يم، چې وايي: ای خلکو، د مولا د راتګ لپاره لاره هواره کړئ!
د افريسي فرقې کوم پيروان چې راغلي وو، دوی پوښتنه ځينې وکړه، چې ستا په وينا ته نه المسيح، نه الياس نبي او نه هغه بل نبي يې. نو بيا څه حق لرې چې خلکو ته سپېڅلې غوټه ورکوې؟
يحيی ﵇ وفرمايل: زه په اوبو سره خلکو ته سپېڅلې غوټه ورکوم، خو ستاسې په منځ کې داسې يو څوک شته، چې تاسې يې له مقامه خبر نه ياست. هغه تر ما وروسته راغلی، خو زه يې د څپليو د ورخلاصولو لياقت هم نه لرم.
په دا بله ورځ چې يحيی ﵇ ګوري، عيسی ﵇ ورته راروان دی. نو يې خلکو ته وفرمايل: وګورئ! دغه دی ذبيح ﷲ (هغه څوک چې د قربانېدو لپاره ټاکل شوی)، چې د آدم ﵇ د نسل ګناهونه به لرې کړي. دا هماغه کس دی، چې ويل مې: «داسې څوک راتلونکی دی چې درجه او مقام يې تر ما لوړ دی، ځکه له ما څخه مخکې دی موجود و.» مخکې مې دی ﵇ د وعده کړل شوي المسيح په توګه نه پېژاند، خو خلکو ته مې په اوبو سره سپېڅلې غوټه ځکه ورکړې ده، تر څو دغه کس بني اسراييلو ته معلوم شي.
بيا يحيی ﵇ شاهدي ادا کړه او ويې فرمايل: ما وليدل چې د آسمان لخوا د ﷲ ﷻ سپېڅلی روح د يوې کوترې په شکل لاندې راځي او پر ده ﵇ کېني. دی ﵇ مې مخکې د وعده کړل شوي المسيح په توګه نه پېژاند، خو کوم چا چې زه په اوبو سره د سپېڅلې غوټې ورکولو لپاره رالېږلی يم، هغه راته فرمايلي وو: «پر هر چا باندې چې زما سپېڅلی روح نازل شو او پرې کېناست، نو پوه شه دا هماغه کس دی، چې انسانان به زما د سپېڅلي روح په واسطه پاکوي.» زه درته وايم چې دغه پېښې مې په خپلو سترګو وليدلې. نو ځکه شاهدي ورکوم چې د خدای ﷻ خاص ټاکل شوی استازی همدا دی.
*خدای ﷻ موسی ﵇ ته فرمايلي وو، چې ستا له قوم څخه به ستا په څېر یو نبي درولېږم. د دغه نبي د راتګ په اړه عقيده د یحیی ﵇ تر زمانې پورې په خلکو کې موجوده وه.