پر ابليس لعين باندې د عيسی ﵇ برلاسی کېدل
له دې وروسته عيسی ﵇ د ﷲ ﷻ د سپېڅلي روح په لارښوونه بيابان ته ولاړ، تر څو هلته ابليس لعين ورڅخه امتحان واخلي. څلوېښت شپې او ورځې يې له خوراکه ډډه وکړه او په پای کې لوږه پرې راغله.
هغه وخت ابليس لعين ورته د امتحان لپاره راغی او ويې ويل: که ته د ﷲ ﷻ خاص نازولی يې، نو امر وکړه چې دا ډبرې په ډوډۍ بدلې شي.
عيسی ﵇ ورته وفرمايل: په آسماني کتابونو کې راغلي دي: «د انسان ژوند يوازې په ډوډۍ نه پايي، بلکې تغذيه يې په هر هغه ټکي سره کېږي، چې ﷲ ﷻ په خپل کلام کې فرمايلي دي.»
بيا ابليس د بلې ازموينې لپاره عيسی ﵇ يروشلم ته وغوښت. دوی په يروشلم کې د بيت المقدس پر لوړ بام ودرېدل. ابليس لعين ورته وويل: که ته د ﷲ خاص نازولی يې، له دې ځايه ځان لاندې وغورځوه، ځکه په آسماني کتابونو کې راغلي دي: «خدای به پر ملايکو ستا د ساتنې امر وکړي. هغوی به تا په خپلو لاسونو کې ونيسي، تر څو پښه دې له کومې ډبرې سره ونه لګېږي.»
عيسی ﵇ په ځواب کې وفرمايل: په آسماني کتابونو کې داسې هم راغلي دي چې «تاسې خپل رب ﷲ ﷻ په امتحان کې مه راولئ.»
بيا ابليس د درېيمې ازموينې لپاره عيسی ﵇ د يو ډېر لوړ غره څوکې ته وغوښت. هلته ابليس د دنيا ټول ملکونه او د هغو شان او شوکت ورته وروښود او ورته يې وويل: که سجده راته وکړې، نو دا ټول به تا ته درکړم.
عيسی ﵇ ورته وفرمايل: ای ابليسه! له مخې مې ورک شه! په آسماني کتابونو کې راغلي دي، چې «تاسې خپل رب ﷲ ﷻ ته سجده وکړئ او يوازې د خدای ﷻ عبادت وکړئ!»
له دې سره د ابليس لعين ټولې دوکې ناکامې شوې. نو تر هغې چې بله موقع په لاس ورتله، له عيسی ﵇ څخه لرې شو.