د يحيی ﵇ دعوت او تبليغ
څو کلونه وروسته يحيی ﵇ د يهوديې بيابان ته تشريف يووړ او خلکو ته يې دا پيغام رساوه چې له خپلو ګناهونو څخه توبه وباسئ او خدای ﷻ ته رجوع وکړئ، ځکه د دې وخت رانږدې دی، چې ﷲ ﷻ به خپل سلطنت قايم کړي.
يحيی ﵇ هغه څوک دی چې اشعيا نبي يې په اړه فرمايلي وو: «په بيابان کې يو څوک نارې وهي او وايي: د مولا د راتګ لپاره لاره هواره کړئ! مسير ورته سيده کړئ! هره کنده ډکه کړئ! هر غر او غونډۍ هواره کړئ. کږې لارې مستقيمې کړئ او له لارې خنډونه ورک کړئ، تر څو ټول بشر د ﷲ ﷻ لخوا رالېږل شوی ژغورونکی وويني.»
کومه جامه چې به يحيی ﵇ اغوستله، د اوښ له وړيو جوړه شوې وه او پر خپلې ملا به يې د څرمنې کمربند تاړه. خوراک به يې ملخان او صحرايي شات وو. له يروشلم، يهوديې ولايت او د اُردن سيند له شاوخوا څخه خورا ډېر خلک ورته راتلل او د خپلو ګناهونو په اعطراف کولو سره به يې په سيند کې د يحيی ﵇ په لاس سپېڅلې غوټه تر سره کوله.
يحيی ﵇ وليدل چې د افريسي او صدوقي فرقو څخه هم ډېر خلک د سپېڅلې غوټې د تر سره کولو په خاطر راغلي دي. نو دوی ته يې وفرمايل: ای د شيطان بچيانو! تاسې چا خبر کړي ياست، چې د ﷲ ﷻ له راتلونکي غضب څخه وتښتئ؟ تاسې داسې کارونه وکړئ تر څو دا ثابته شي چې په رښتيا مو توبه کړې ده. په دې مه نازېږئ، چې موږ د خپل ستر نيکه ابراهيم ﵇ اولاده يو. زه تاسې ته حقيقت وايم، چې ﷲ ﷻ پر دې قادر دی، چې د ابراهيم ﵇ نسل له دې ډبرو څخه رامنځ ته کړي. خبردار اوسئ! د دنيا د خلکو حال داسې وګڼئ لکه ونې. الهي تبر تيار دی چې د ونو ريښې پرې کړي. هره هغه ونه چې ښه مېوه او ثمره نه ورکوي، په تبر به ووهل شي او اور ته به واچول شي.
له دې سره د ټولو خلکو په زړونو کې اميد پيدا شو او په دې فکر کې ولاړل، چې آيا يحيی ﵇ خو به وعده کړل شوی خاص استازی المسيح نه وي؟
يحيی ﵇ ورته وفرمايل: زه هغو خلکو ته چې توبه وباسي په اوبو سره سپېڅلې غوټه ورکوم، خو له ما څخه د لوړې درجې څښتن راتلونکی دی، چې زه يې له پښو څخه د څپليو ايستلو لياقت هم نه لرم. هغه ﵇ به مو زړونه په اوبو نه، بلکې د ﷲ ﷻ په سپېڅلي روح او پاکوونکي اور سره درپرېمينځي. هغه ﵇ آماده دی چې ښه او بد خلک داسې سره جلا کړي، لکه يو بزګر چې غنم او بوس سره جلا کوي. غنم به په ګدام کې راټول او خوندي کړي، مګر بوس به په نه مړه کېدونکي اور کې واچوي.
يحيی ﵇ په همدې ډول خلکو ته ډېر نصيحتونه کول او د المسيح د راتګ زېری يې ورکاوه.