په دوولس کلنۍ کې د عيسی ﵇ حکمت

مريمې ﵂ او يوسف نجار به هر کال د پنا اختر په يروشلم کې تېراوه. کله چې عيسی ﵇ دوولس کلن شو، نو دوی له ځان سره يروشلم ته بوت، تر څو دی ﵇ هم ورسره د اختر شرعي مراسم تر سره کړي. د اختر له مراسمو وروسته دوی بېرته خپل ښار ته روان شول، خو عيسی ﵇ ترې جدا شو او په يروشلم کې پاتې شو. مريم ﵂ او يوسف نجار له دې څخه ناخبره وو. فکر يې کاوه، چې عيسی ﵇ په قافله کې ورسره دی. کله چې ماښام شو، دوی په کاروان کې په عيسی ﵇ پسې وګرځېدل. له خپلوانو او دوستانو يې پوښتنه وکړه، خو عيسی ﵇ يې پيدا نه کړ. نو بېرته يروشلم ته ورپسې ولاړل، چې ګوندې هلته يې پيدا کړي. له درېيو ورځو پلټنو وروسته يې عيسی ﵇ د بيت المقدس په حرم شريف کې وموند. ګوري چې د علماوو په مجلس کې تشريف لري او له هغوی سره سوال او ځواب کوي. ټولو حاضرينو چې يې خبرې واورېدې، ډېر حيران شول، چې دا هلک څومره په پوهې او حکمت سره ځوابونه ورکوي! همدارنګه مريمې ﵂ او يوسف نجار چې عيسی ﵇ په دې حال وليد، نو دوی هم ورته ګوته په غاښ پاتې شول. مريمې ﵂ عيسی ﵇ ته وفرمايل: زويه! دا دې له موږ سره څه وکړل؟ زه او ستا پالونکی تر اوسه په تا پسې سرګردانه او پرېشانه ګرځېدو.

عيسی ﵇ وفرمايل: ولې راپسې ګرځېدئ؟ تاسې ته نه وه معلومه چې زه باید د خپل اصلي پالونکي په کور کې واوسم؟

مګر دوی د دې خبرې په مقصد پوه نه شول. له دې وروسته عيسی ﵇ له دوی سره بېرته ناصرت ته ولاړ او هلته يې د دوی تابعداري کوله. مريمې ﵂ دغه ټولې پېښې په خپل زړه کې واچولې. ورځ تر بلې د عيسی ﵇ جسم قوي کېده. پوهه او حکمت يې هم زياتېده. هغه ﵇ د ﷲ ﷻ او د خلکو له رضايت څخه برخمن و.