د عيسی ﵇ د تعظيم لپاره د ستورپېژندونکو راتګ
عيسی ﵇ د يهوديې د پاچا هيرودِ اعظم په وخت کې د بيت لحم په ښار کې نړۍ ته مبارکې سترګې خلاصې کړې. په هغه وخت کې، څو تنه ستورپېژندونکي له ختيځ څخه يروشلم ته راغلل. دوی له خلکو څخه پوښتنه وکړه، چې د بني اسراييلو هغه نوی پيدا شوی پاچا چېرې دی؟ موږ په ختيځ کې يو ستوری ليدلی دی، چې د هغه د زېږېدو په وياړ خدای ﷻ په آسمان کې مقرر کړی دی. اوس راغلي يو چې د دغه ماشوم پښو ته ورټيټ شو.
کله چې دا خبره د هيرود پاچا تر غوږونو ورسېده، نو پاچا او د يروشلم ټول خلک په تشويش کې شول. پاچا د بني اسراييلو لوی امامان او ديني عالمان راوغوښتل او پوښتنه يې ترې وکړه، چې د کلام ﷲ د وړاندوينې له مخې د المسيح د زېږېدلو ځای چېرې دی؟
دوی وويل: د يهوديې ولايت، په بيت لحم ښار کې. د ميکا نبي په ليکنه کې د ﷲ ﷻ داسې فرمان راغلی دی:
«ای بيت لحمه! ته د يهودا د ټبر په ځمکه کې تر ټولو لوړه درجه لرې، ځکه چې په تا کې به يو رهبر راپورته شي، چې زما د منتخب قوم اسراييلو لارښوونه به د يوه شپون غوندې وکړي.»
هيرود پاچا چې دا واورېده، ځان ته يې په پټه ستورپېژندونکي راوغوښتل او د نوي ستوري په اړه يې معلومات ترې واخيستل، چې څه وخت دوی ته ښکاره شوی و. بيا يې ورته وويل: تاسې بيت لحم ته ولاړ شئ او د نوي پيدا شوي ماشوم پلټنه وکړئ. کله چې مو پيدا کړ، فوراً ما ته احوال راوړئ، چې زه هم ورشم او پښو ته يې ورټيټ شم.
ستورپېژندونکي د پاچا له خبرې سره سم بيت لحم ته روان شول. ګوري، هغه ستوری چې دوی په خپل وطن کې ليدلی و، په آسمان کې دی. د دوی په مخ کې ځي او لارښوونه يې کوي، تر څو د هغه کور پر سر ودرېد، چې مبارک ماشوم پکې و. د دې په ليدلو سره دوی خورا ډېر خوشحاله شول. کور ته ورننوتل او ماشوم عيسی ﵇ يې له خپلې مور مريمې ﵂ سره وليد. د تعظيم لپاره يې پښو ته ورټيټ شول، خپلې صندوقچې يې خلاصې کړې، سره زر، عطر او خوشبويي يې ترې راوايستل او ماشوم عيسی ته يې ډالۍ کړل. کله چې دوی وېده شول، په خوب کې لارښوونه ورته وشوه، چې تاسې به بېرته هيرود ته نه ورګرځئ.
دوی هم له بلې لارې څخه خپل وطن ته ولاړل.
د دغو کسانو تر تګ وروسته د ﷲ ﷻ لخوا يوسف نجار ته يوه ملايکه په خوب کې راښکاره شوه او ورته ويې فرمايل: پاڅه! ماشوم او مور يې درسره روان کړه او مصر ته هجرت وکړه. زما تر بل امر پورې هلته پاتې شه! ځکه، هيرود پاچا د ماشوم په لټه کې دی او قصد لري چې ويې وژني.
يوسف نجار هم په هماغه شپه له خپل ځايه راپاڅېد، ماشوم او مور يې دواړه له ځان سره مصر ته روان کړل.
کله چې هيرود ته خبر ورسېد، چې ستورپېژندونکو له ده سره چالاکي کړې ده، نو سور اور پرې بل شو. پر خپلو عسکرو يې حکم وکړ، چې ورشئ او په بيت لحم ښار او په شاوخوا سيمو کې ټول تر دوو کلونو کم عمره نارينه ماشومان ووژنئ. (پاچا د عيسی ﵇ عمر د ستورپېژندونکو د خبرو پر بنسټ تخمين کړی و.) دا امر د ارميا نبي د هغې وړاندوينې پوره کېدل وو، چې فرمايلې يې وه:
«له راما ښار څخه د ژړا او لوی ماتم غږ اورېدل کېږي.
د بني اسراييلو مور بي بي راحيله په قبر کې په خپلو اولادونو پسې ژاړي.
زړه يې نه آرامېږي،
ځکه چې نور يې اولاد نشته.»
وخت تېرېده. بالاخره هيرود پاچا مړ شو. هغه وخت په مصر کې يوسف نجار ته د ﷲ ﷻ لخوا په خوب کې يوه ملايکه راښکاره شوه او ويې فرمايل: پاڅه! ماشوم او مور يې درسره روان کړه او بېرته د بني اسراييلو ځمکې ته ولاړ شه، ځکه هغه خلک چې د ماشوم د وژلو په تلاش کې وو، اوس مړه شوي دي.
په همدې سره د ﷲ ﷻ هغه خبره رښتيا او پوره شوه، چې د مخکيني پیغمبر په وسيله يې فرمايلي وو: «خپل نازولی مې له مصره راوغوښت.»
يوسف نجار راپاڅېد، ماشوم ﵇ او مور يې له ځان سره د بني اسراييلو ځمکې ته راوستل. خو کله چې خبر شو، چې د يهوديې نوی پاچا د هيرود زوی ارخلاوس دی، په يهوديې کې له اوسېدو څخه ووېرېد. يو ځل بيا په خوب کې الهي لارښوونه ورته وشوه، چې ګليل سيمې ته ولاړ شئ. دوی هم هلته د ناصرت په ښار کې استوګن شول او دا د پخوانيو پيغمبرانو د هغې وړاندوينې رښتيا او پوره کېدل وو چې فرمايي: «د ﷲ ﷻ لخوا وعده کړل شوی خاص استازی المسيح به خلک ناصرتي وبلي.»
عيسی ﵇ ورځ په ورځ لويېده او غښتلی کېده. حکمت يې زياتېده او تل د ﷲ ﷻ له فضل څخه برخمن و.