په بيت المقدس کې ﷲ ﷻ ته د ماشوم عيسی ﵇ سپارل

کله چې ماشوم په اتمه ورځ سنت کړل شو، نو نوم يې پرې عيسی کېښود، څرنګه چې له حمل اخيستو څخه د مخه جبراييل ﵇ مريمې ﵂ ته فرمايلي وو.

کله چې د مبارک ماشوم څلويښتي پوره شوه، نو د تورات له حکم سره سم، چې هرې ښځې بايد خپل لومړی زوی ﷲ ﷻ ته وقف کړی وای، په همدې سبب يوسف نجار او مريمې ﵂ هم ماشوم عيسی ﵇ يروشلم ته يووړ، تر څو ﷲ ﷻ ته يې وقف کړي. بيا مريمې ﵂ او يوسف نجار د تورات دا حکم هم پر ځای کړ، چې دوې کوترې او يا دوې قمري دې قرباني شي.

په يروشلم کې د شمعون په نوم يو صالح او پرهېزګار سړی و. هغه خپل ټول عمر په دې انتظار کې تېر کړی و، چې د ﷲ ﷻ وعده کړل شوی استازی المسيح به راځي او بني اسراييلو ته به خلاصون ورکوي. پر هغه د ﷲ ﷻ سپېڅلی روح نازل و او په الهام سره ورته ويل شوي وو: «تر څو چې دې په خپلو سترګو زما خاص استازی المسيح نه وي ليدلی، تر هغې به درته مرګ نه راځي.» کله چې مريم ﵂ او يوسف نجار د شريعت د حکم پر ځای کولو په خاطر ماشوم عيسی ﵇ بيت المقدس ته راووړ، شمعون هم د ﷲ ﷻ د سپېڅلي روح په لارښوونه بيت المقدس ته راغلی و. مبارک ماشوم يې په غېږ کې واخيست، د ﷲ ﷻ حمد او ثنا يې ادا کړه او ويې ويل: يا مالکه! اوس د خپلې وعدې له مخې خپل بنده له نړۍ څخه رخصت کړه، ځکه چې ما ستا رالېږل شوی ژغورونکی په خپلو سترګو وليد، چې تا د ټولو ولسونو لپاره مقرر کړی دی. دغه بچی به د نړۍ د قومونو د سترګو خلاصوونکی نور او رڼا وي او ستا د منتخب قوم * بني اسراييلو لپاره به د سرلوړۍ سبب وګرځي.

د دې خبرو په اورېدو سره مريم ﵂ او يوسف نجار هک حيران شول. بيا شمعون ﵂ دوی ته دعا وکړه او مريمې ﵂ ته يې وفرمايل: دا هلک به د ډېرو بني اسراييلو د لوړېدو او يا د ذليلېدو سبب وګرځي. د ﷲ ﷻ لخوا به يوه نښانه شي، چې خلک به يې مخالفت وکړي. د دې مخالفت له امله به ستا زړه د غم په توره ووهل شي، خو په پای کې به دی د خلکو د زړونو خبرې د رښتيا ميدان ته راوباسي.

په دغه وخت کې د بي بي حنې په نامه يوه دينداره ښځه، چې ﷲ ﷻ به ورته الهام کاوه، د دوی خوا ته راغله. هغه د فنوييل لور او د اَشير له ټبره وه او د واده په اووم کال کونډه شوې وه. له هماغه وخته يې په کونډتوب کې خپل عمر په بيت المقدس کې عبادت ته وقف کړی و. شپه او ورځ به په روژو او دعاګانو بوخته وه. اوس څلور اتيا کلنه وه. کله چې بي بي حنې ماشوم عيسی ﵇ وليد، د خدای ﷻ شکر يې پر ځای کړ او د وعده کړل شوي المسيح له پيدايښت څخه يې ټول هغه کسان خبر کړل، چې د يروشلم د خلاصون په انتظار وو.

*خدای ﷻ د بني اسراييلو قوم ته فضيلت ورکړی و او د نړۍ له نورو ټولو قومونو څخه يې دوی ته برتري ورکړې وه. دغه کار د هغه عهد او تړون پر بنسټ سره شوی و، چې خدای ﷻ لومړی له ابراهيم ﵇ او بیا له موسی ﵇ سره تړلی و.