د مولا عيسی ﵇ مبارک ميلاد
په هغو وختو کې د روم امپراتور آګوستوس حکم صادر کړ، چې د روم په ټوله امپراتورۍ کې دې سرشمېرنه وشي. د امپراتور له حکم سره سم ټول خلک اړ وو، چې خپلو پلرنيو ښارونو ته ولاړ شي او نومونه ثبت کړي. په دې خاطر يوسف نجار هم له خپلې مېرمنې مريمې ﵂ سره، چې حامله وه، د ګليل له ناصرت ښاره يهوديې ته ولاړ، تر څو د داود ﵇ په ښار بيت لحم کې نوم ثبت کړي، ځکه چې دی د داود ﵇ له نسله و. دوی په بيت لحم کې وو، چې د بي بي مريمې ﵂ د حمل موده پوره شوه او خپل لومړنی زوی يې دنيا ته راووړ. بيا يې په اوڼيو کې وپېچه، خو څرنګه چې په مېلمستون کې د دوی لپاره ځای نه و، نو ماشوم يې په يوه آخور کې څملاوه.
هماغه شپه له ښاره دباندې يو څو شپنو خپلې رمې ساتلې. په دې وخت کې يوه ملايکه ورته راښکاره شوه او د ﷲ ﷻ د جلال رڼا د شپنو په شاوخوا کې وځلېده. دوی وهم او وېرې واخيستل. ملايکې وفرمايل: مه وېرېږئ! تاسې ته مې د خوشحالۍ داسې يو زېری راوړی دی، چې د ټولو انسانانو لپاره به د لويې ښادۍ سبب وګرځي. همدا نن د داود ﵇ په ښار کې د ﷲ ﷻ خاص استازی مولا المسيح نړۍ ته راغلی، چې د ﷲ ﷻ لخوا د انسانانو د نجات لپاره غوره شوی دی. تاسې يې په دې نښه پيدا کولای شئ، چې په اوڼيو کې به تاو او په يوه آخور کې به ايښودل شوی وي.
بيا ناڅاپه ډېرې نورې ملايکې هم په آسمان کې راښکاره شوې او د ﷲ ﷻ په حمد او ثنا ويلو يې پيل وکړ او داسې يې وويل:
په سپېڅلي عرش کې دې پر ﷲ ﷻ حمد او ثنا وي
او په ځمکه کې دې پر هغو کسانو سلامتي وي،
چې خدای ﷻ ورځينې راضي وي.
کله چې ملايکې بېرته آسمان ته ولاړې، نو شپنو له يو بل سره وويل: راځئ چې بيت لحم ته ولاړ شو او دغه پېښه چې ﷲ ﷻ پرې خبر کړي يو، په خپلو سترګو يې ووينو!
دوی هم په بېړه بيت لحم ته ولاړل او تر پوښتنو او ګرځېدو وروسته يې مريم ﵂ او يوسف نجار پيدا کړل او له دوی سره يې هغه مبارک ماشوم هم په آخور کې پروت وليد. د دې په ليدو سره يې شاوخوا خلکو ته د ملايکې هغه خبرې بيان کړې، چې ماشوم په اړه يې ورته فرمايلې وې. د شپنو د خبرو په اورېدو سره ټول خلک هک حيران شول، خو مريمې ﵂ دا خبرې په ياد وساتلې او په زړه کې يې خورا غور او فکر پرې کاوه. شپنو چې د ملايکو خبرې په عمل کې وليدلې، نو د ﷲ ﷻ د حمد او لويۍ په بيانولو سره خپل ځای ته ستانه شول.