يوسف نجار ته د ملايکې هدايت

يوسف نجار، چې له مريمې ﵂ سره يې کوژده کړې وه، د هغې په حمل خبر شو. هغه چې يو صالح سړی و، نو زړه يې نه غوښتل چې مریم ﵂ رسوا او بدنامه کړي. په دې سبب يې فيصله وکړه، چې پټ په پټه يې خوشې کړي. په داسې حال کې چې له ځان سره يې دا کرل او رېبل، چې دا کار څه ډول وکړي، په خوب کې د ﷲ ﷻ لخوا يوه ملايکه ورته راښکاره شوه او ويې فرمايل: ای يوسفه، د داود له نسله! له دې څخه مه وېرېږه، چې مريم خپل کور ته د خپلې مېرمنې په توګه بوزې، ځکه چې حمل يې د ﷲ ﷻ د سپېڅلي روح په قدرت سره اخيستی دی. هغه به يو زوی وزېږوي، چې نوم به يې عيسی * ږدې، ځکه چې هغه به خپل قوم ته له ګناهونو څخه نجات ورکړي.

دغه ټولې خبرې د اشعيا نبي د هغه پيغام رښتيا کېدل وو، چې ﷲ ﷻ فرمايلي وو:

«وګورئ! يوه پاک لمنه پېغله به حمل واخلي
او يو زوی به راوړي.
دی به په عمانوييل يادېږي،
چې معنی يې ده: (ﷲ ﷻ له موږ سره دی).»

يوسف نجار چې له خوبه راوېښ شو، دغه الهي فرمان يې عملي کړ، چې ملايکې ورته فرمايلی و او له مريمې ﵂ سره يې واده وکړ، خو تر هغه وخته پورې چې هغې زوی رانه ووړ، يوسف نجار ورسره نژدېکت ونه کړ.

*په عبري ژبه کې د (عيسی) کلمې لغوي معنی «خدای ﷻ نجات ورکوي» ده.