زکريا ﵇ د خدای ﷻ حمد او ثنا وايي

د ﷲ ﷻ سپېڅلی روح د ماشوم پر پلار زکريا ﵇ نازل شو او هغه ﵇ په الهام سره وفرمايل: د بني اسراييلو رب ﷲ ﷻ ته دې حمد او ثنا وي، ځکه چې پر موږ يې د مرستې نظر کړی او خلاصون يې راکړی دی. ﷲ ﷻ موږ ته د خپل خدمتګار داود ﵇ له اولادې څخه يو قدرتمند ژغورونکی رالېږلی دی، لکه څرنګه چې له ډېر پخوا څخه يې د خپلو مقدسو پيغمبرانو په واسطه ژمنه کړې وه، چې موږ ته به له دښمنانو او بد غوښتونکو څخه نجات راکوي. ﷲ ﷻ زموږ پر پلرونو او نيکونو رحم کړی دی او خپل هغه سپېڅلی عهد او تړون يې نه دی هېر کړی، کوم چې يې زموږ له ستر بابا ابراهيم ﵇ سره کړی و او فرمايلي يې وو: «زه به تاسې ته له دښمنانو نجات درکړم، تر څو بې له وېرې او په پاکۍ او صداقت سره د عمر تر پايه پورې زما عبادت وکړئ.»

بيا يې خپل کوچني زوی يحيی ته وفرمايل: ای زما بچيه! تا به ﷲ تعالی خپل نبي وګرځوي او ته به د مولا د راتګ لپاره لاره هواره کړې. خلک به په دې وپوهوې چې د خپلو ګناهونو په بخښل کېدو سره به دوی نجات پیدا کړي. دا زموږ د خدای ﷻ رحمت او مهرباني ده، چې زموږ د مرستې لپاره به له آسمان څخه خپل نور او رڼا راوځلوي، تر څو هغو خلکو ته چې په تيارو کې وي او د مرګ سيوری پرې غالب وي، روښنايي ورکړي او موږ د سلامتۍ لارې ته هدايت کړي.

د وخت په تېرېدو سره يحيی ﵇ ځوانېد او روحي قدرت يې پيدا کاوه. هغه ﵇ په بيابان کې اوسېد. بيا هغه وخت راورسېد چې په بني اسراييلو کې د نبوت دنده پيل کړي.