د يحيی ﵇ زېږېدنه
د اليصابات د حمل موده چې پوره شوه، يو زوی يې پيدا شو. کله چې د زکريا ﵇ ګاونډيان او خپلوان خبر شول، چې پر اليصابات ﷲ ﷻ فضل او رحمت کړی دی، نو په ډېرې خوشحالۍ سره يې مبارکۍ ورکړې. د کوچني ماشوم د پيدايښت په اتمه ورځ ډېر خلک د سنتۍ مراسمو ته راغلل. هغوی غوښتل چې پر ماشوم د خپل پلار زکريا نوم کېږدي، خو اليصابات وويل: نه! نوم يې يحيی دی.
خلکو په حيرانتيا سره وويل: دا ته څه وايې؟ ستاسې په کورنۍ کې خو د يحيی په نوم څوک نه دی تېر شوی.
بيا يې په اشارو له زکريا ﵇ پوښتنه وکړه، چې ستا کوم نوم خوښ دی؟
زکريا ﵇ ترې يوه تخته وغوښته او پرې ويې ليکل: نوم يې يحيی دی.
د دې حالت په ليدو سره، خلک هک حيران شول. په هماغه لحظه د زکريا ﵇ ژبه خلاصه شوه او په حمد او ثنا ويلو يې پيل وکړ.
شاوخوا ټول خلک په هيبت کې شول او د دې پېښې خبر د يهوديې په ټوله غرنۍ سيمه کې خپور شو. هر چا چې به دا خبر واورېد، په زړه کې به يې فکر پرې کاوه او له ځانه سره به يې ويل: له دې هلک څخه به څه جوړېږي؟ دا يې ځکه ويل، چې له ماشوم سره د ﷲ ﷻ قدرت و.