مريمې ﵂ ته د مولا عيسی ﵇ د زېږېدو زېری
د اليصابات د حمل په شپږمه مياشت ﷲ ﷻ جبراييل ﵇ د ګليل ولايت ناصرت ښار ته ولېږه، تر څو د مريمې په نوم يوې پېغلې ته پيغام ورسوي. مريم ﵂ د يوسف نجار په نوم له يوه کس سره کوژده شوې وه.
جبراييل ﵇ مريمې ﵂ ته راښکاره شو او ويې فرمايل: پر تا دې سلام وي، چې الهي پېرزوينه درباندې شوې او ﷲ ﷻ درسره دی!
د جبراييل ﵇ د سلام په اورېدو سره مريم ﵂ ووېرېده او په دې فکر کې شوه، چې دا څه ډول سلام و؟ ملايکې وفرمايل: مريمې! مه وېرېږه! ځکه چې ته ﷲ ﷻ له خپل فضل او پېرزوينې څخه برخمنه کړې يې. ته به حامله شې او يو زوی به وزېږوې، چې نوم به پرې عيسی ږدې. هغه به د لويې درجې خاوند وي او د ﷲ تعالی خاص نازولی به وبلل شي. ﷲ رب العزت به هغه ته د خپل ستر نيکه داود ﵇ تخت او سلطنت ورکړي. هغه به تل تر تله پورې د يعقوب ﵇ پر اولاده (بني اسراييلو) پاچاهي وکړي او سلطنت به يې هېڅ پای ونه لري.
مريمې ﵂ ملايکې ته وفرمايل: څنګه امکان لري، چې زوی به مې پيدا شي، په داسې حال کې چې تر اوسه کوم سړی ما ته نه دی رانږدې شوی.
ملايکې وفرمايل: د خدای ﷻ سپېڅلی روح به پر تا نازل شي او د ﷲ تعالی د قدرت سيوری به درباندې پرېوزي. په همدې سبب به ستا مبارک زوی د ﷲ ﷻ خاص نازولی وبلل شي. وګوره! ستا خپلوانه اليصابات به خلکو وچه او شنډه بلله، مګر د ﷲ ﷻ په قدرت سره په سپين سر توب کې حامله شوې او د شپږو مياشتو ماشوم يې په نس دی. هېڅ داسې څه نشته چې د ﷲ ﷻ په وس پوره نه وي!
مريمې ﵂ وفرمايل: زه د ﷲ ﷻ تابعداره بنده يم. هر څه چې تاسې وفرمايل، هغسې دې راسره وشي.
له دې وروسته جبراييل ﵇ له مريمې ﵂ څخه غيب شو.