زکريا ﵇ ته د يحيی ﵇ د پيدا کېدو زېری

د يهوديې د پاچا هيرودِ اعظم په زمانه کې د زکريا ﵇ په نوم يو امام و، چې خپل د امامت منصب يې د خپل ستر نيکه امام ابيا له سلسلې څخه تر لاسه کړی و. ښځه يې اليصابات نومېده، چې هغه هم د خپل مېړه په څېر د هارون ﵇ له نسله وه. ښځه او خاوند دواړه د ﷲ ﷻ صالح بنده ګان وو، چې د ﷲ ﷻ حکمونه او لارښوونې يې په پوره ډول عملي کولې. دوی د اولاد له نعمته بې برخې وو، ځکه چې بي بي اليصابات نه حامله کېده او دواړه زاړه شوي وو.

يوه ورځ د امام ابيا * د سلسلې د امامانو وار راورسېد، چې په بيت المقدس کې ﷲ ﷻ ته خدمت وکړي. نو د امامانو له دود سره سم دې ډلې پچه واچوله، تر څو يو کس وټاکل شي، چې په بيت المقدس کې خوشبويي وسوځوي *. په پچه کې د زکريا ﵇ نوم راووت. کله چې زکريا ﵇ دننه خوشبويي سوځوله، ډېر خلک دباندې په حرم شريف کې راټول شوي وو او په دعا او عبادت بوخت وو. ناڅاپه د ﷲ ﷻ له خوا يوه ملايکه راښکاره شوه او د خوشبويۍ سوځولو د ځای په ښي لوري کې ودرېده. د دې حالت په ليدو سره زکريا ﵇ وهم واخيست او وېره پرې خپره شوه.

ملايکې وفرمايل: زکريا! مه وېرېږه! ﷲ ﷻ ستا دعا قبوله کړې ده. ستا ښځه اليصابات به يو زوی وزېږوي چې نوم به پرې يحيی ږدې. هغه به تا ته د خوښۍ او ښادۍ سبب شي او په زېږېدنې سره به يې ډېر خلک خوشحالي وکړي. د ﷲ ﷻ په نظر به د لويې درجې خاوند وي. هېڅکله بايد شراب او يا کوم بل نشه کوونکی څښاک ونه څښي. پر هغه به حتی تر زېږون مخکې د ﷲ ﷻ سپېڅلی روح نازل وي. ډېر بني اسراييل به بېرته د خپل رب ﷲ ﷻ لارې ته راولي. تر مولا به مخکې راشي او د الياس نبي غوندې طاقت او قدرت به ورسره وي، تر څو د پلرونو زړونه بېرته زامنو ته ورمات کړي او سرکښان د راستکارانو حکيمې لارې ته ورواړوي. په همدې ډول به هغه ﵇ د ﷲ ﷻ لپاره خلک تيار کړي.

زکريا ﵇ ملايکې ته وفرمايل: څنګه باور وکړم، چې داسې به وشي، ځکه چې زه زوړ شوی يم او ښځه مې هم سپين سرې شوې ده.

ملايکې وويل: زه جبراييل امين يم، چې تل د ﷲ ﷻ په حضور کې ولاړ يم. د دې لپاره رالېږل شوی يم، تر څو د خوشحالۍ دغه زېری تر تا راورسوم. اوس مې دا خبره واوره! تر څو چې دا خبره نه وي رښتيا شوې، ته به خبرې نه شې کولای، دا ځکه چې زما په خبرو دې باور ونه کړ. زما خبرې به په خپل وخت سره عملي شي.

دباندې خلک د زکريا ﵇ په انتظار کې حيران ولاړ وو، چې ولې يې دننه دومره ځنډ وکړ؟ په پای کې زکريا ﵇ بيرون راووت، خو خبرې يې نه شوای کولای. د دې حالت په ليدو سره خلک پوه شول، چې دننه پر هغه ﵇ وحې نازلې شوې دي. زکريا ﵇ له خلکو سره په اشارو خبرې کولې، مګر ژبه يې بنده وه. کله چې په بيت المقدس کې د زکريا ﵇ د امامت دوره پوره شوه، نو بېرته کور ته ستون شو.

څه موده وروسته د زکريا ﵇ مېرمن اليصابات حامله شوه. هغه پنځه مياشتې له کوره ونه وتله او ويل يې: ﷲ ﷻ پر ما د رحم نظر کړی او د بې اولادۍ له پېغوره يې ژغورلې يم.

*ﷲ تعالی حضرت هارون ﵇ او د هغه نسل پر بني اسراييلو باندې امامان مقرر کړي وو، چې د خدای ﷻ د سپېڅلي کور خدمت وکړي. د حضرت داود ﵇ په وخت کې امامان په څلور ويشتو ډلو وېشل شوي وو، چې هرې ډلې به په کال کې دوه اونۍ خدمت کاوه. له دغو ډلو څخه د يوې ډلې مشر امام ابيا نومېد او د دغې ډلې امامان د ده له اولادې څخه وو.

*د امامانو يوه دنده دا وه، چې د بيت المقدس په سپېڅلې خونه کې خوشبويي وسوځوي. د دغه دندې د تر سره کولو لپاره به امامانو په خپل منځ کې پچه اچوله. د هر چا نوم چې به راوخوت، نو هغه ته به دا ویاړ ورپه برخه شو، چې خوشبويي وسوځوي.