د مولا عيسی ﵇ د مبارک سيرت سريزه
دغه کتاب د عظيم الشان پيغمبر حضرت عیسی ﵇ د سيرت په اړه دی، هغه شخص چې په قرآن کريم کې د (روح ﷲ) او (کلمه ﷲ) په نوم هم یاد شوی دی.
د قرآن کريم د آل عمران سورت په ۳۳ آيت کې راغلي:
ترجمه: بېشكه ﷲ په عالمونو باندې ادم او نوح او الِ ابراهیم او الِ عمران غوره كړي دي.
همداسې ده، عيسی ﵇ د همدغې غوره کړل شوې کورنۍ اړوند دی او د اسلام او بشريت د تاريخ له مطرح شخصيتونو څخه يو دی. د مثال په ډول د قرآن کريم په درې لويو سورتونو کې چې آل عمران، المائده او مريم دي، د عیسي ﵇ له مبارک نوم سره تړاو لري. ( د یادونې وړ ده، چې آل عمران او المائدې سورتونه د قرآن له لويو سورتونو څخه دي.) هغه قرآني آيتونه چې د عيسی ﵇ په اړه دي، له نوي څخه يې شمېر زیات دی. د دې تر څنګ په اسلامي ادبیاتو کې د هغه ﵇ په اړه ډېر حديثونه او روايتونه شته دي. په شرقي شاعرۍ کې تر ډېره په غزلونو کې عیسی ﵇ د داسې یو برجسته شخص په توګه یاد شوی دی، چې مړي راژوندي کوي، ناروغانو ته شفا ورکوي او مایوسه زړونو ته تسلي وربخښي.
دلته له لوستونکو سره دا طبیعي پوښتنې راولاړېږي، چې دغه سيرت ولې او د څه په موخه وړاندې کوو؟ که خبره د معجزو وي، خو نورو پيغمبرانو هم معجزې درلودې. آيا عیسی ﵇ داسې خاصې کومې ځانګړتياوې لري، چې هغه ﵇ له نورو پيغمبرانو څخه ځانګړی کوي؟ که یې لري، نو د کومو معتبرو ماخذونو پر بنسټ دغه ادعا ثابتوو؟
لومړی قرآن کريم ته مراجعه کوو، چې د دې په اړه څه تشریحات وړاندې کوي. دلته غواړو تاسې ته د عیسی ﵇ د مبارک ميلاد په اړه د قرآن کريم ځينې مبارک آيتونه راوړو.
ﷲ ﷻ جبراييل آمین د څو نورو ملایکو په ملتيا سره سپېڅلې مريم (رض) ته رالېږي. جبراييل ﵇ ورته راښکاره کېږي، چې د دې پېښې بيان د قرآن کريم د مريم سورت په ۱۷ آیت کې داسې راغلی دی:
ترجمه: نو دې د دوى په طرف پرده ونیوله، نو مونږ دې ته خپل روح (مَلَك جبريل) ولېږه، نو هغه دې ته د كامل سړي په شكل كې څرګند شو.
حضرت مریم ﵂ وېريږي او فرمايي:
ترجمه: نو دې وویل: بېشكه زه له تا نه په رحمٰن پورې پناه نیسم، كه چېرې ته پرهېزګاره يې. (مريم سورت ۱۸ آيت)
بيا جبراييل ﵇ فرمايي:
ترجمه: او كله چې ملايكو وویل: اى مریمې! یقینًا ﷲ ته غوره كړې يې او ته يې پاكه كړې يې او د ټول عالم پر ښځو يې تا ته غوره والى دركړى دى. (آل عمران سورت ۴۲ آيت)
جبراييل ﵇ زیاتوي:
ترجمه: هغه وویل: یقینًا زه خو يواځې ستا د رب رسول (استاځى) یم، د دې لپاره چې (د خپل رب په حكم) تا ته یو ډېر پاك هلك دركړم. ( مريم سورت ۱۹ آيت)
بي بي مريم ﵂ چې سپېڅلې او باکره ده، نه پوهېږي چې څه پېښېږي، نو فرمايي:
ترجمه: دې وویل: زما به هلك څنګه پیدا شي؟ حال دا چې ما ته هېڅ يو بشر لاس هم نه دى راوړى، او زه چېرې بدكاره هم نه یم. ويې ويل: خبره همداسې ده (لېكن) ستا رب فرمایلي دي: دغه كار ما ته ډېر اسان دى او د دې لپاره چې مونږ هغه (ماشوم) د خلقو لپاره نښه وګرځوو او له خپل جانب نه رحمت او دغه یو فیصله شوى كار دى. (مريم سورت ۲۰ و ۲۱ آیتونه)
د دې پېښې په تړاو د آل عمران سورت په ۴۵ او ۴۶ آيتونو کې داسې راغلي دي.
ترجمه: كله چې ملايكو وویل: اى مریمې! بېشكه ﷲ تا ته له خپل طرف نه د یوې كلمې زېرى دركوي، چې د هغه نوم مسیح عیسٰی زوى د مریم دى، چې په دنیا او اخرت كې به ډېر مخور وي او له مُقرَبینو څخه به وي او له خلقو سره به خبرې كوي په زانګو (غېږ) كې او په پاخه عمر كې او وي به له صالحانو ځنې.
نو د دغو قرآني آيتونو له مخې د عیسي ﵇ ځانګړتياوې په لاندې ډول دي:
زکي دی، یعنې له ګناهونو څخه پاک. (ابلیس پر هغه مبارک نه شوای غالبېدلای)
المسیح دی، چې د سلطان موقف لري.
د ﷲ ﷻ لخوا يو آيت یا نښه وه.
هغه ﵇ د خدای ﷻ رحمت دی.
حضرت عیسی ﵇ کلیمه ﷲ دی.
هغه ﵇ په دې دنیا او په هغې دنیا کې د عزت خاوند دی.
د ﷲ ﷻ په مقربينو کې راځي.
د خدای ﷻ په صالحينو کې حسابېږي.
دغه کتاب موږ ته د عیسی ابن مریم د شخصیت په اړه معلومات راکوي. تاسې به په دې کتاب کې ولولئ، چې عيسی ﵇ د خدای ﷻ لخوا د يو پاک ذات په توګه نړۍ ته رالېږل شوی و، تر څو خلک ﷲ ﷻ ته نږدې کړي. همدارنګه وبه ولولئ چې هغه ﵇ په څه ډول د انسانانو پر ستر دښمن ابلیس لعين باندې غالب شو. دا به هم ولولئ چې څنګه يې د خلکو په زړونو کې د مینې، سولې او سلامتۍ سيند په څپو راوستی دی.
حضرت عیسی ﵇ د خپلو اعمالو او تعليماتو په وسيله موږ ته له خدای ﷻ او ټولو انسانانو سره د مینې کولو رښتینې لاره راښيي، چې د دغې لارې په عملي کولو سره ټول مومنین خير او کاميابۍ ته رسېدای شي.
دا د خدای ﷻ يو نعمت دی، چې دغه کتاب ستاسې په ژبه ترجمه شوی دی او تاسې ورته لاس رسی لری.
درنو لوستونکو! که تاسې غواړئ چې د حضرت عیسی ﵇ د شخصيت او تعليماتو په اړه لا زیاتو معلوماتو ته لاسرسی ولرئ، نو له موږ سره په لاندې پته په اړیکه کې شئ تر څو موږ درسره همکاري وکړو.
academyihsan.com@gmail.com
یا ﷲ! دا چې موږ ته دې دغه نوراني تعليمات راکړي دي تا ته دې حمد او ثنا وي.
موږ تاسې ټولو ته دې ﷲ ﷻ توفیق راکړي، چې په صراط مستقيم لاره باندې ولاړ شو.
ومن ﷲ توفیق